अतुल नवघरे
लाखपुरी :- विदर्भातील प्रसिद्ध तीर्थक्षेत्र श्री लक्षेश्वर संस्थान लाखपूुरी ता. मूर्तिजापुर जि.अकोला येथे दरवर्षीप्रमाणे श्रावण महिन्याच्या शेवटच्या रविवारी कावड यात्रा उत्सव मोठ्या उत्साहात संपन्न झाला. मूर्तिजापूर, दर्यापूर व अंजनगाव तालुक्यातील जवळपास ३२ मोठे मंडळ या यात्रेत सहभागी झाले होते. सर्वजनिक कावड उत्सव समिती तर्फे दहा हजार शिवभक्तांसाठी महाप्रसाद तयार करण्यात आला होता.ग्रामपंचायत तर्फे नदीपर्यंत रस्ता दुरुस्ती व लाईटची व्यवस्था करण्यात आली.तहसील कार्यालय मुर्तीजापुर तर्फे नदीवर सर्च लाईट बसवले.मा.आ. हरीश पिंपळे यांनी ॲम्बुलन्स,आरोग्य पथक,पिण्याच्या पाण्याची व्यवस्था केली.श्री लक्षेश्वर संस्थानतर्फे मंदिरावर विद्युत रोषणाई,स्टेज,तैराकी पथक, वाहनतळ इत्यादी व्यवस्था केली.
- सत्कार समांरभ
कावड यात्रेनिमित्त लाखपूरीच्या प्रत्येक कार्यक्रमाला सहकार्य करणारे ज्येष्ठ मार्गदर्शक माननीय रामभाऊ आकारामजी साळुंके गुरुजी यांच्या ७५व्या वाढदिवसानिमित्त व नवनिर्वाचित राष्ट्रवादी काँग्रेस पक्षाचे जिल्हाध्यक्ष संग्रामभैया गावंडे यांची नियुक्ती झाल्याबद्दल व कबड्डीपटू स्व.धनंजय देशमुख यांच्या परिवाराला वीस हजार रुपयांची मदत करणारे जि.प. सदस्य सम्राट डोंगरदिवे या सर्वांचा सार्वजनिक उत्सव समितीतर्फे जाहीर सत्कार करण्यात आला.
रात्री बारा वाजता महाआरती करण्यात आली.यावेळी मुख्य यजमान मंगेश काळे नगरसेवक मनपा अकोला हे उपस्थित होते. आरतीनंतर कावडचे प्रस्थान झाले.शेवटची कावड सकाळी चार वाजता गेली.कावड यात्रा व्यवस्थित पार पाडण्याकरिता लक्षेश्वर संस्थानचे शेकडो कार्यकर्त्यांनी परिश्रम घेतले.
- ठाणेदार नितीन पाटील साहेब यांचे शिवभक्तांनी मानले आभार.
कावळ यात्रेदरम्यान रविवारी दुपारी तीन वाजता पासून रात्री चार वाजेपर्यंत मुर्तीजापुर ग्रामीण पोलिस स्टेशनचे ठाणेदार नितीन पाटील यांनी स्वतः हजर राहून वाहतूक व्यवस्था सुरळीत लावली.त्याचप्रमाणे नदीपासून ते मुर्तिजापूरपर्यंत अनेक ठिकाणी चोख बंदोबस्त ठेवला.त्यांच्या नियोजनामुळे कावड यात्रा शिस्तबद्ध व शांततेत संपन्न झाली.त्यांचं कार्य पाहून सर्व शिवभक्त कावड मंडळांनी ठाणेदार नितीन पाटील व त्यांच्या सर्व टिमचे तोंड भरून कौतुक केले त्यांचे आभार मानले.