औरंगाबाद :- मुख्यमंत्री देवेंद्र फडणवीस यांनी संभाजी भिडे गुरुजींना क्लिन चीट दिली, तेव्हा आमदारांनी आवाज उठविला नाही. मुख्यमंत्र्यांनी भिडेंना सोडले, मात्र आम्ही सोडले नाही. भाजपचे पानिपत झालेच पाहिजे. त्यासाठी संघटित लढ्याची गरज आहे, असे प्रतिपादन शनिवारी बहुजन रिपब्लिकन सोशालिस्ट पार्टीचे अध्यक्ष डॉ. सुरेश माने यांनी केले.
पक्षातर्फे सरस्वती भुवन कॉलेज परिसरातील गोविंदभाई श्रॉफ सभागृहात संविधान हक्क परिषदेचे आयोजन करण्यात आले होते. त्याप्रसंगी अध्यक्षीय भाषण करताना डॉ. माने बोलत होते. या परिषदेचे उद्घाटन राष्ट्रीय उलेमा कौन्सिलचे प्रवक्ता हाजी सय्यद इरशाद अशरफी यांच्या हस्ते झाले. प्रमुख पाहुणे म्हणून पक्षाचे प्रदेश संयोजक सर्वजित बनसोडे, प्रदेश उपाध्यक्ष महादू पगारे, प्रदेश महासचिव सुनील वाकेकर, मराठवाडा महासचिव शिवाजी वीर, अॅड. डी. व्ही. खिल्लारे, अरविंद कांबळे, सुभाष राजन, अशोक धनगावकर आदी उपस्थित होते. उद्घाटनपर भाषण करताना हाजी सय्यद यांनी भाजपच्या धोरणावर टीका करत किती दिवस गुलाम म्हणून राहणार, असा सवाल केला. आता क्रांतीची गरज असून त्यासाठी सज्ज व्हावा, असे आवाहन केले. डॉ. माने यांनी आपल्या भाषणात आरक्षण आणि अत्याचार, अॅट्रासिटी याच मुद्यावर दलित समाज फिरत राहिला पाहिजे, अन्य मुलभूत हक्क, प्रश्नांकडे त्याचे लक्ष जाऊ नये, यासाठी सदैव प्रयत्न केला जातो. दर्जा सुधारण्याऐवजी आहे त्या सरकारी शाळा बंद पाडण्याचा घाट सरकारने चालविला आहे, असा आरोप त्यांनी केला.
- ऐक्य असताना विजय का मिळाला नाही?
डॉ. माने म्हणाले, भिडे गुरुजींना मुख्यमंत्र्यांनी सोडून दिले असेल, पण आम्ही सोडले नाही. कोर्टात रिट याचिका दाखल केली आहे. जनसमूहाच्या लढ्याने सर्व निर्णय पदरात पाडून घेणे शक्य नाही. त्यावेळे कायद्याच्या चौकटीचा खुबीने वापर करायला हवा, असेही त्यांनी कार्यकर्त्यांशी बोलताना सांगितले. ऐक्य व्हायला हवे, असे म्हटले जाते. पण १९६५ ते १९९० पर्यंत तर एकच पक्ष होता. तेव्हा विजय मिळविता का आला नाही ? असा सवाल त्यांनी केला.
