जालना :- मराठा आरक्षणासाठी विशेष अधिवेशन बोलवावे या मागणीसाठी पश्चिम महाराष्ट्रातील लोकप्रतिनिधींसोबत जालना जिल्ह्यातील मंत्री व लोकप्रतिनिधी मुख्यमंत्री देवेंद्र फडणवीस यांची भेट घेणार असल्याचा निर्णय मंत्री व आमदारांनी घेतला. जिल्हा परिषदेच्या यशवंतराव चव्हाण सभागृहात सोमवारी पालकमंत्री बबनराव लोणीकर, राज्यमंत्री अर्जुनराव खोतकर, आमदार नारायण कुचे, मराठा क्रांती मोर्चाचे समन्वयक व समाज बांधव यांची सायंकाळी दोन तास मॅरेथॉन बैठक घेण्यात आली.
मराठा समाजाला आरक्षण मिळालेच पाहिजे, ही सर्वांचीच आग्रही भूमिका आहे. त्यासाठी जे करायला लागले ते करू, अशी ग्वाही लोकप्रतिनिधींनी दिली. विशेष अधिवेशनाचा निर्णय न झाल्यास लोकप्रतिनिधींच्या घरासमोर ठिय्या आंदोलन करण्याचा निर्धार सकल मराठा समाजाच्या वतीने करण्यात आला. या वेळी समाज बांधवांनी आपल्या तीव्र भावना व्यक्त केल्या. मराठा समाजाला आरक्षणासह अन्य मागण्यांसाठी राज्यभरात मूक व ठोक मोर्चे काढण्यात आले. राज्य मागासवर्ग आयोगाचा अहवाल प्राप्त झाल्यानंतर मराठा समाजाला आरक्षण देऊ, अशी भूमिका राज्य सरकारने घेतली आहे.
२० सप्टेंबरपर्यंत अधिवेशन न झाल्यास मुंबईतील आंदोलन अधिक तीव्र करण्याचा इशारा देण्यात आला. या बैठकीस समाज बांधवांची मोठ्या संख्येने उपस्थिती होती.
लोणीकर म्हणाले, 'मागासवर्गीय आयोगाचा अहवाल न्यायालयात मांडून न्यायालयीन प्रक्रियेत टिकणारे आरक्षण देण्यास राज्य सरकार कटीबद्ध आहे. यासाठी समाज बांधवांच्या मागणीनुसार २० सप्टेंबरच्या आत अधिवेशन घ्यावे यासाठी मुख्यमंत्र्यांकडे आग्रह धरणार आहे. वसतिगृहासाठी जागेचा शोध सुरू असून प्रसंगी घटना दुरुस्तीसाठी केंâद्राकडे राज्य सरकार आग्रही राहील.' तर खोतकर म्हणाले, '
मराठवाड्यातील मंत्री व सर्वपक्षीय आमदारांना सोबत घेवून मुख्यमंत्र्यांसोबत बैठक घेणार आहोत. आरक्षणासाठी विशेष अधिवेशनाबाबत आग्रही असून उद्याच्या बैठकीत सकारात्मक निर्णय होईल.' आरक्षणासाठी दोन आठवडे सभागृह बंद पाडल्याची आठवणही त्यांनी करुन दिली. समाज बांधवांच्या तीव्र भावना मुख्यमंत्र्यांसमोर मांडणार असून मराठा समाज आरक्षणास कशा पद्धतीने पात्र आहे. याचे पुरावे सादर करणार असल्याचे खोतकर यांनी सांगितले.
