मराठा आरक्षणाच्या मागणीसाठी काकासाहेब शिंदे या तरुणाने औरंगाबादमध्ये गोदावरी नदीत उडी घेऊन आत्महत्या केल्यानंतर राज्यात ठिकठिकाणी त्याचे पडसाद उमटत आहेत. मराठा क्रांती मोर्चाने बंद पुकारून निषेध नोंदवला आहे. अनेक ठिकाणी घडलेल्या हिंसक घटनांमुळेही तणावाची स्थिती निर्माण झाली आहे. या स्थितीवरच बोट ठेवत मुख्यमंत्री देवेंद्र फडणवीस यांच्यावर राजीनाम्यासाठी दबाव वाढत असल्याचे राऊत यांनी म्हटले आहे.
महाराष्ट्रात आज जे काही चित्र दिसत आहे ते राजकीय नेतृत्वाचे अपयश आहे. त्यातूनच मुख्यमंत्री बदलाच्या चर्चा रंगल्या आहेत. या चर्चा महाराष्ट्रात रंगलेल्या नाहीत तर भाजपमध्येच रंगलेल्या आहेत, अशी माझी खात्रीशीर माहिती असल्याचा दावा राऊत यांनी केला.
- ही शिवसेनेची अफवा: भाजप
भाजपचे प्रवक्ते माधव भंडारी यांनी मात्र संजय राऊत यांचा दावा फेटाळला आहे. राज्यातलं सरकार आणि मुख्यमंत्री चांगलं काम करत आहेत. सरकार स्थिर आहे. पक्षातही कोणतीच नाराजी नाही. मुख्यमंत्री बदलणार ही केवळ शिवसेनेने पसरवलेली अफवा आहे, असे भंडारी म्हणाले.