नवी दिल्ली :- जैश-ए-मोहम्मद आणि लश्कर-ए-तोयबा या दोन्ही दहशतवादी संघटनांचे एकूण १२ अतिरेकी नवी दिल्लीत घुसले आहेत. दिल्लीत मोठा घातपात घडवून आणण्याचा या अतिरेक्यांचा कट असून पंतप्रधान कार्यालय आणि लाल किल्ला या अतिरेक्यांच्या हिटलिस्टवर आहे. स्वातंत्र्य दिनाच्या पार्श्वभूमीवर हा घातपात करण्यात येणार असल्याने दिल्लीत अॅलर्ट जारी करण्यात आल्याचं सूत्रांनी सांगितलं.
येत्या १५ ऑगस्ट रोजी दिल्लीला अधिक धोका असल्याचं सूत्रांनी सांगितलं. गेल्या अनेक वर्षापासून दिल्लीला टार्गेट करण्याचा दहशतवाद्यांनी प्रयत्न केला होता. मात्र त्यात ते यशस्वी होऊ शकले नव्हते. त्यामुळेच त्यांना यावेळी दिल्लीत मोठा घातपात घडवून आणायचा आहे. त्यासाठी जैश-ए-मोहम्मद आणि लश्कर- ए- तोयबा या दोन्ही अतिरेकी संघटना कामाला लागल्या आहेत. हा घातपात घडवून आणण्यासाठी जैशचे ७ तर तोयबाचे ५ असे १२ अतिरेकी दिल्लीत घुसल्याचं सूत्रांनी सांगितलं. एटीएस पथक आणि पश्चिम बंगाल पोलिसांनी नोएडामध्ये जमात-उल-मुजाहिद्दीनचे २ संशयित दहशतवादी पकडले होते. दिल्लीतील घातपाती कारवायांच्या शक्यतेच्या पार्श्वभूमीवर या संशयित दहशतवाद्यांकडून चौकशी केली जात आहे.
दिल्लीत घुसलेल्या १२ अतिरेक्यांना पाकिस्तानची गुप्तचर संघटना आयएआयकडून पाठबळ मिळत आहे. त्याबाबत दिल्ली पोलिसांना आयबी आणि रॉसहीत इतर यंत्रणांनी माहिती दिली आहे. या माहितीनुसार अतिरेकी १५ ऑगस्ट रोजी किंवा त्याच्या आगेमागे कधीही दिल्लीत घातपाती कारवाई करण्याची शक्यता आहे. केवळ दिल्ली पोलीसच नव्हे तर देशातील सर्व गुप्तचर यंत्रणांना अॅलर्ट राहण्याच्या सूचना देण्यात आल्या आहेत. अतिरेकी पंतप्रधान कार्यालय आणि लाल किल्ल्यात बॉम्ब ठेवणार असल्याच्या सूचनाही दिल्ली पोलिसांना मिळाल्या आहेत. त्यामुळे स्पेशल सेल कामाला लागला असून या अतिरेक्यांचा शोध घेतला जात आहे. लवकरच या अतिरेक्यांपैकी कुणाला तरी अटक केली जाईल, अशी शक्यता पोलिसांनी वर्तवली असल्याचं सूत्रांनी सांगितलं.