नवी मुंबई :- नवी मुंबईच्या कळंबोली येथे बंद दरम्यान आंदोलकांनी पोलिसांवरच दगडफेक केल्याने या दगडफेकीत पोलीस अधिक्षक जखमी झाला आहे. आंदोलकांनी पोलिसांवर दगडफेक करतानाच पोलिसांच्या गाड्यांची जाळपोळ केल्याने जमावाला पांगविण्यासाठी पोलिसांना हवेत गोळीबार करावा लागला. त्यामुळे कळंबोलीत प्रचंड तणाव निर्माण झाला आहे.
आज दुपारी कळंबोलीमध्ये शेकडो मराठा आंदोलकांनी मोर्चा काढत मुंबई-पुणे एक्सप्रेसवेवर ठिय्या आंदोलन केले. काही आंदोलकांनी रस्त्यावरच टायर जाळल्याने वाहतुकीची प्रचंड कोंडी झाली. त्यामुळे अनेक प्रवाशी रस्त्यातच अडकून पडले आहेत. पोलिसांनी या आंदोलकांना पांगविण्याचा प्रयत्न केला असता आंदोलक आणि पोलिसांमध्ये शाब्दिक चकमक उडाली. यावेळी आंदोलकांनी दगडफेक केल्याने पोलीस अधिक्षक संदीप पाटील जखमी झाले. त्यानंतर या आंदोलकांनी पोलिसांची गाडी फोडत या गाडीला पेटवून दिले. त्याशिवाय आंदोलकांनी रस्त्यावर जळते टायर फेकले. त्यामुळे पोलिसांनी जमावाला पांगविण्यासाठी त्यांच्यावर लाठीमार केला. त्यात पाच-सहा आंदोलक जखमी झाले. त्यामुळे आंदोलक आणखीनच आक्रमक झाले आणि त्यांनी पुन्हा पोलिसांवर दगडांचा मारा सुरू केल्याने पोलिसांनी या जमावाला पांगविण्यासाठी हवेत गोळीबार केला. त्यामुळे या परिसरात तणावाची स्थिती निर्माण झाली आहे.
- ओला आणि उबेर धावल्याच नाही
मुंबई- ठाण्यात आंदोलकांनी रेल्वे आणि बसेसला टार्गेट केल्याने रस्त्यावरून अत्यंत तुरळक प्रमाणात बसेस धावत आहेत. रिक्षा चालकांनीही रिक्षा बंद ठेवल्या असून ओला आणि उबेरही रस्त्यावर धावत नसल्याने प्रवाशांचे अतोनात हाल होत आहेत. वाहनच मिळत नसल्याने विमानतळावर जाणाऱ्या प्रवाशांनाही त्रास सहन करावा लागत आहे.
- भाजी मार्केटमध्ये शुकशुकाट
बंदच्या पार्श्वभूमीवर दादर आणि ठाणे भाजीपाला मार्केट बंद ठेवण्यात आले आहे. आज भाजीपाला मार्केटमध्ये भाजीपाल्याच्या गाड्या येऊ शकल्या नाहीत. त्यामुळे ग्राहकांची कोंडी झाली आहे.
- मानखूर्दमध्ये बेस्टची बस पेटवली
मानखुर्दमध्येही जमाव रस्त्यावर उतरला. मानखुर्दच्या मोहिते-पाटील नगरमध्ये आंदोलकांनी बसमध्ये पेट्रोलच्या बाटल्या फेकून बस पेटवण्यात आली. बस पेटवल्याचं कळताच अग्निशमन दलाच्या जवानांनी घटनास्थळी धाव घेऊन बसला लागलेली आग विझवण्याचा प्रयत्न केला. कुर्ला आगाराची ५१७ क्रमांकाची ही बस आहे. ही बस सांताक्रुझवरून नेरूळला जात असताना मानखुर्द येथे दुपारी १.३० वाजता जमावाने पेटवली.