अहमदाबाद :- पाटीदार आरक्षण आंदोलनाच्यावेळी विसनगर विधानसभा क्षेत्रातील आमदार ऋषिकेश पटेल यांच्या कार्यालयात तोडफोड केल्याप्रकरणी पाटीदार समाजाचे नेते हार्दिक पटेल आणि लालजी पटेल यांना दोषी ठरवत विसनगर न्यायालयाने प्रत्येकी दोन वर्षाची शिक्षा सुनावली आहे. त्याशिवाय न्यायालयाने या दोघांनाही प्रत्येकी ५०-५० हजार रुपयांचा दंड ठोठावला आहे. मात्र १५ हजार रुपयांच्या वैयक्तिक जात मुचलक्यावर सशर्त जामीन देण्यात आल्याने हार्दिक पटेल यांची अटक टळली आहे.
२०१५ मध्ये पाटीदार आरक्षण आंदोलनावेळी हार्दिक पटेल आणि १६ जणांच्या नेतृत्वाखाली ५०० लोकांनी भाजप आमदार ऋषिकेश पटेल यांच्या कार्यालयाची तोडफोड केली होती. या तोडफोड प्रकरणी हार्दिक पटेल आणि त्यांच्या दोन सहकाऱ्यांना विसनगर न्यायालयाने आज दोषी ठरवले. हे तिघेही जण २७ ऑगस्टपर्यंत कोर्टाच्या निर्णयाला उच्च न्यायालयात आव्हान देऊ शकतात, असं कोर्टानं म्हटलं आहे. त्यांनी उच्च न्यायालयात धाव नाही घेतली तर त्यांना कोर्टासमोर आत्मसमर्पण करावं लागणार असल्याचंही विसनगर कोर्टानं स्पष्ट केलं. दरम्यान मेहसाना आणि विसनगर दंगल प्रकरणातून न्यायालयाने १४ जणांची मुक्तता केली आहे.