अमरावती सुपर स्पेशालिस्ट रुग्णालयात यशस्वी प्रत्यारोपण
मुर्तीजापुर : दोन्ही किडन्या निकामी झालेल्या गॅस टँकर चालक मुलास आईने किडनी देऊन आपल्या पोटच्या गोळ्याला मृत्यूच्या दाढेतून परत आणून मातृत्वासोबत दातृत्वाचा परिचय दिला.आई आपल्या पाल्याचे प्राण वाचवण्यासाठी शेवटच्या क्षणापर्यंत धडपड करते हे या घटनेवरून दिसून आले आहे .
तालुक्यातील उमरी अरब येथे राहणारे मुस्ताक बिन मुजफ्फर चाऊस (वय-३९) हे गॅस टँकर चालवुन आपला कुटुंबाचा उदरनिर्वाह करीत होते. मागील एक वर्षापासून किडनीच्या आजाराने ते त्रस्त झाले होते त्यांच्या आजारावर किडनी प्रत्यारोपण हाच एकमेव पर्याय होता.
त्या अनुषंगाने अमरावती येथील सुपर स्पेशलिटी हॉस्पिटलमध्ये त्यांच्या आई शकीला बी मुजफ्फर चाऊस (वय-५८) यांनी एक किडनी आपल्या मुलास घेऊन जीवदान दिले.प्रत्यारोपणाची शस्त्रक्रिया अमरावती येथील वैद्यकीय अधीक्षक डॉ.अमोल नरोटे, विशेष कार्यकारी अधिकारी डॉ. मंगेश मेंढे यांच्या मार्गदर्शनास नेफ्रॉलॉजिस्ट डॉ.प्रणित काकडे,डॉ. नयन काकडे ,डॉ.हितेश गुल्हाने ,युरोसर्जन डॉ.राहुल पाटोडे,डॉ. विक्रम देशमुख, डॉ. विशाल बेलवीर ,डॉ. प्रतीक चिरडे ,बधिरीकरण तज्ञ डॉ. रोहित हातगावकर, डॉ.बालकृष्ण बागवले ,डॉ.दिपाली देशमुख ,डॉ. जफर अली,डॉ.नंदिनी देशपांडे,डॉ.अंजू दामोदर,डॉ.सुनीता हिवसे आर.एम.ओ. , किडणी समन्वयक डॉ.शीतल बोंडे यांच्यासह संपूर्ण पथकाने महत्त्वपूर्ण जबाबदारीची भूमिका बजावली.
सामाजिक सेवा अधीक्षक सोनाली चौधरी यांनी संपूर्ण कागदपत्राचे पूर्तता करून महात्मा ज्योतिबा फुले जनआरोग्य योजना अंतर्गत किडनी प्रत्यारोपण शस्त्रक्रिया निशुल्क करण्यात आली. मुस्ताक बिन मुजफ्फर चाऊस यांची १ डिसेंबर रोजी झालेली किडनी प्रत्यारोपणाची ३३ वी शस्त्रक्रिया सुपर स्पेशालिटी हॉस्पिटल अमरावती येथील शस्त्रक्रिया होती. सदर रुग्णालयात किडनी प्रत्यारोपणाची ३३ शस्त्रक्रिया यशस्वीरित्या पार पडल्यामुळे शासकीय रुग्णालयांमध्ये देखील मोठ्या शस्त्रक्रिया यशस्वी होत असल्याने सर्वसामान्य गोरगरिबांना दिलासा मिळत आहे.