.jpeg)
अकोला : बांधकाम कामगारांना अर्ज नोंदणीसाठी वार्षिक केवळ एक रूपया शुल्क आकारण्‍यात येते व रीतसर पावतीही देण्‍यात येते. त्यामुळे कामगार बांधवांनी कुठल्याही भूलथापांना बळी पडू नये, असे आवाहन सहाय्यक कामगार आयुक्‍त डॉ. रा.दे.गुल्‍हाने यांनी केले आहे.
महाराष्‍ट्र इमारत व इतर बांधकाम कामगार कल्‍याणकारी मंडळाच्‍या असंघटित कामगारांची नोंदणी, नूतनीकरण व विविध योजना लाभ वाटपाचे काम करताना एक रुपया वार्षिक शुल्काव्‍यतिरिक्‍त कोणतेही अतिरिक्‍त शुल्क आकारले जात नाही. नोंदणी, नूतनीकरण व विविध योजनेबाबत अडचण असल्यास कार्यालयास प्रत्यक्ष भेट द्यावी किंवा कार्यालयाचे मोबाईल क्र. 7576625585 वर संपर्क करावा.
या कामकाजासाठी कोणत्‍याही खासगी प्रतिनिधी, अथवा एजंट, दलाल यांची नेमणूक करण्‍यात आलेली नाही. बांधकाम कामगारांना त्‍यांच्‍या योजनेनुसार कागदपत्राची तपासणी करण्‍याकरिता कार्यालयात खिडकीवर दिलेल्‍या तारखेस व्यक्तिशः उपस्थित राहून मूळ कागदपत्राची पडताळणी करणे आवश्‍यक आहे. बांधकाम कामगारांनी इतर कोणत्‍याही खोट्या बोलण्याला बळी न पडता नोंदणी व नुतनीकरण करून घ्‍यावे. तसेच अतिरिक्‍त रक्‍कम मागणी करणा-या व्‍यक्‍तीविरूध्‍द नजिकच्‍या पोलीस ठाण्‍यामध्‍ये परस्‍पर तक्रार नोंदवावी, असे आवाहन मा. डॉ. गुल्‍हाने यांनी केले आहे.
कार्यालयाचे स्थानांतर..
मंडळाचे कार्यालय सहाय्यक कामगार आयुक्‍त, अकोला कार्यालयाचे जागेत होते. आता त्याचे स्थानांतर झाले असून कार्यालयाचा नवीन पत्‍ता मराठा सेवा संघ कार्यालय, छत्रपती संभाजी मार्ग, मुर्तिजापूर रोड, आर.टी.ओ. च्या जुन्या कार्यालयाजवळ, अकोला असा आहे.