बंगळुरू :- एका ज्योतिषाने सल्ला दिल्याने बस स्थानाकातून तब्बल सव्वा तास बस बाहेरच न काढल्याची अजब घटना कर्नाटकमध्ये घडलीय. अपवित्र राहू काळ सुरू असल्याने आपण बस थांबवून ठेवल्याचे स्पष्टीकरण बसचालकाने वरिष्ठांना दिलंय.
बंगळुरू परिवहन निगममध्ये बसचालक म्हणून कार्यरत असलेल्या योगेश गौडा यांनी ज्योतिषाच्या सल्ल्यामुळे बस उशिरा सोडल्याचं स्पष्ट झालंय. मिनिटांनी मॅजेस्टिक बस स्थानकापर्यंत जाणारी ही बस पहाटे ६ वाजून १५ मिनिटांनी सुटणार होती. परंतु, त्या क्षणी बस डेपोतून निघाली तर बसला अपघात होईल आणि किमान १५ जणांचा मृत्यू होईल असं ज्योतिषानं सांगितलं होतं. ३१ ऑगस्टला योगेश एका ज्योतिषाला भेटले होते तेव्हा त्यांनी अपघाताची ही भविष्यवाणी केली होती. त्यावेळी राहू काळ सुरू असून राहूच्या प्रकोपामुळे बस अपघात निश्चित होता आणि १५ मृत्यूही अटळ होते असं ज्योतिषानं सांगितलं. त्यामुळे ऑनड्युटी असलेल्या योगेश यांनी तब्बल सव्वा तासांनी ती बस डेपोतून बाहेर काढली. बसमधील अनेक प्रवाशांनी अधिकाऱ्यांकडे योगेश गौडांची तक्रारही केली परंतु, योगेशनी आपला हट्ट सोडला नाही आणि ६.१५ ला सुटणारी बस ७.२५ ला निघाली.
अधिकाऱ्यांना, प्रवाशांना अजब वाटणाऱ्या या कृतीबद्दल स्पष्टीकरण देताना योगेश म्हणाले, माझ्यासाठी बस वेळेवर डेपोतून बाहेर काढण्यापेक्षा प्रवाशांचे प्राण वाचवणं जास्त गरजेचं होतं. त्यामुळे अशुभ काळात बस डेपोबाहेर काढणं मी टाळलं आणि सव्वा तासांनी शुभ काळ सुरू झाल्यावर सगळ्यांना सुखरुपपणे इच्छित स्थळी पोहोचवले.