मुंबई :- जमियत उलेमा-ए-हिंद, महाराष्ट्रच्या शिष्टमंडळाने आज मुख्यमंत्री श्री देवेंद्र फडणवीस यांची विविध मागण्यांसाठी तसेच अल्पसंख्यक समुदायासाठी राबविण्यात येणार्‍या विविध कल्याणकारी योजनांच्या अंमलबजावणीबाबत विस्तृत चर्चा करण्यासाठी मुंबई येथे भेट घेतली. शिक्षण आणि संस्कृती संवर्धनासाठी जमियत उलेमा-ए-हिंद देत असलेल्या योगदानाची यावेळी मुख्यमंत्र्यांनी प्रशंसा केली. यावेळी बोलताना मुख्यमंत्री म्हणाले की, छत्रपती राजर्षि शाहू महाराज शैक्षणिक शुल्क प्रतिपूर्ती योजनेच्या माध्यमातून आज अल्पसंख्यक समुदायाच्या विद्यार्थ्यांना सुद्धा उच्च शिक्षणासह 605 अभ्यासक्रमांसाठी 50 टक्के शुल्क प्रतिपूर्तीचा लाभ दिला जात आहे.
बदलत्या काळात अल्पसंख्यक तरूणांना उद्योजकतेच्या व्यापक संधी उपलब्ध करून देण्याच्या दृष्टीकोनातून औरंगाबाद येथे अल्पसंख्यक समुदायासाठी कौशल्य प्रशिक्षण विद्यापीठ स्थापन करण्यात येत आहे. यासाठी केंद्र सरकारकडे पाठपुरावा सुरू असून, तो अंतिम टप्प्यात आहे. अशाप्रकारचे हे देशातील पहिले विद्यापीठ राज्यात स्थापन होणार आहे. अल्पसंख्यक समुदायासाठी विविध कल्याणकारी योजनांवर राज्य सरकारने आपल्या खर्चात आधीच्या तुलनेत तिप्पट वाढ केली आहे. जमियत उलेमा-ए-हिंद ने सरकारसोबत आणखी सहकार्याने काम करीत सरकारच्या या योजना समाजापर्यंत न्याव्या आणि त्याच्या अंमलबजावणीत सरकारला सहकार्य करावे, असे आवाहन केले. इतरही सर्व मागण्यांबाबत सरकार सकारात्मक असून, राज्य सरकार अल्पसंख्यक समुदायाच्या पाठीशी ठामपणे उभे राहील, असे त्यांना आश्वस्त केले.