मुंबई :- दुधाला लिटरमागे पाच रुपये अनुदान मिळावे या मागणीसाठी स्वाभिमानी शेतकरी संघटनेनं सुरू केलेल्या आंदोलनाची राज्याचे कृषीराज्यमंत्री सदाभाऊ खोत यांनी खिल्ली उडवली आहे. 'हे आंदोलन शेतकऱ्यांसाठी नसून निवडणुकांसाठी आहे आणि रस्त्यावर ओतल्या जाणाऱ्या दुधात किती पाणी हे मला चांगलं माहीत आहे,' असं खोत यांनी म्हटलं आहे.
खासदार राजू शेट्टी यांच्या नेतृत्वाखाली राज्यात सकाळपासून दूध आंदोलन सुरू झाले आहे. ठिकठिकाणी गाड्या अडवल्या जात असून दूध रस्त्यावर ओतले जात आहे. या आंदोलनावरून राज्य सरकार व आंदोलकांमध्ये आरोप-प्रत्यारोप सुरू झाले आहेत. निमंत्रण देऊनही शेट्टी चर्चेला येत नसल्याचं सरकारचं म्हणणं आहे. तर, सरकारनं चर्चेसाठी बोलावलेलंच नाही, असं शेट्टी यांचं म्हणणं आहे.
या सगळ्या पार्श्वभूमीवर शेट्टी यांचे एकेकाळचे सहकारी सदाभाऊ खोत यांनी आंदोलकांच्या हेतूवरच प्रश्नचिन्ह उभं केलं आहे. ते एका वृत्तवाहिनीशी बोलत होते. 'या आंदोलनाचा शेतकऱ्यांच्या हिताशी काडीचाही संबंध नाही. स्वत:ला नेता म्हणून पुढं आणण्यासाठी हे सगळं सुरू आहे. मुख्यमंत्र्यांनी चर्चेची तयारी दाखवूनही ते चर्चेला येत नाहीत. प्रश्न सोडविण्याची त्यांची इच्छाच दिसत नाही,' अशी तोफ खोत यांनी शेट्टींवर डागली.
दुधाच्या नासाडीबाबत खोत यांना विचारले असता ते म्हणाले, 'मी स्वत: अशा आंदोलनांतूनच पुढं आलोय. रस्त्यावर ओतल्या जाणाऱ्या दुधात पाणी किती असतं आणि दूध किती असतं हे मला चांगलं माहीत आहे.'