पुणे :- 'मुख्यमंत्री देवेंद्र फडणवीस यांनी शांतताप्रिय मराठा समाजाला घातपाती ठरवून 'तुम्ही छत्रपतींचे मावळे असूच नाहीत,' असे विधान केले आहे. त्यामुळे मराठा समाजाचा, मराठा क्रांती मोर्चाचा अपमान झाला आहे. त्याबद्दल मुख्यमंत्र्यांनी मराठा समाजाची जाहीर माफी मागावी, अन्यथा राज्यातील वातावरण बिघडण्याची शक्यता आहे,' असा इशारा मराठा क्रांती मोर्चाचे समन्वयक व संभाजी ब्रिगेडचे प्रदेशाध्यक्ष प्रवीण गायकवाड यांनी दिला. आगामी निवडणुका डोळ्यासमोर ठेवून मुख्यमंत्री जनतेची दिशाभूल करून बहुजन समाजात फूट पाडत आहेत, असा आरोपही त्यांनी केला.
मराठा क्रांती मोर्चातर्फे आयोजित पत्रकार परिषदेत ते बोलत होते. मोर्चाचे समन्वयक शांताराम कुंजीर, इतिहासाचे अभ्यासक श्रीमंत कोकाटे, सुभाष बोरकर, विठ्ठल घव्हाड आदी या वेळी उपस्थित होते. आर्थिक, सामाजिकदृष्ट्या मागासलेल्या मराठा समाजाला आरक्षण मिळावे, या मागणीसाठी मराठा समाजाने ५८ मोर्चे काढले. या मोर्चांमध्ये एकही दुर्दैवी घटना घडलेली नाही. अशा शांतताप्रिय समाजावर मुख्यमंत्री धडधडीत खोटे आरोप करत आहेत. मराठा आरक्षणाचा मुद्दा न्यायप्रविष्ट असताना राज्यात ७२ हजार पदांच्या मेगाभरतीत १६ टक्के अनुशेष राखून ठेवण्याची भाषा मुख्यमंत्री करत आहेत. त्याद्वारे मराठा समाज, ओबीसी, अनुसूचित जाती-जमाती व अल्पसंख्यांकांमध्ये भांडणे लावली जात असल्याचा आरोपही त्यांनी केला.
शहांच्या दौऱ्यामुळे 'महापूजा' रद्द
भारतीय जनता पक्षाचे राष्ट्रीय अध्यक्ष अमित शहा यांचा मुंबई दौरा व स्वत:च्या वाढदिवसामुळे मुख्यमंत्र्यांनी पंढरपूरला महापूजेसाठी येण्याचे रद्द केले. मात्र, त्याचे खापर जनतेवर फोडून वारकऱ्यांची दिशाभूल केली जात असल्याचा आरोपही मोर्चाच्या समन्वयकांनी केला.
भिडे गुरुजींना का अडविले नाही?
गुप्तचर खात्याच्या अहवालाचा हवाला देत वारीत घातपाताची शक्यता मुख्यमंत्र्यांनी वर्तविली आहे. त्यामुळे वारकऱ्यांमध्ये अस्वस्थता निर्माण झाली आहे. वास्तविक मुख्यमंत्री हा गोपनीय अहवाल जाहीरच कसा करतात? कोरेगाव-भीमा व औरंगाबाद येथे घडलेल्या घटनांचा गोपनीय अहवाल नव्हता का? भिडे गुरुजींचे धारकरी वारीत सशस्त्र घुसतात, त्या वेळी गोपनीय अहवालाचा आधार घेऊन त्यांना का अडविले नाही? त्या वेळी मुख्यमंत्र्यांना वारकऱ्यांची काळजी वाटत नाही का, असे सवालही प्रवीण गायकवाड यांनी केले.
मराठा समाजाच्या मागण्या मान्य न झाल्याने तरुण आत्महत्या करत आहेत. मुलांच्या शिक्षणाचा प्रश्न निर्माण झाला आहे. त्याला सरकारच जबाबदार आहे. मुख्यमंत्र्यांनी वर्षा बंगल्यावर विठ्ठलाची पूजा केली आहे. आता विठ्ठलच त्यांना सद्बुद्धी देवो.
- प्रवीण गायकवाड, समन्वयक, मराठा क्रांती मोर्चा
- प्रवीण गायकवाड, समन्वयक, मराठा क्रांती मोर्चा