यवतमाळ : शेतात कीटकनाशक फवारणीची बाधा होऊन एका युवकाचा मृत्यू झाल्याची घटना पुसद तालुक्यातील सवना येथे घडली. मंगल सुभाष बल्लाळ (१९) असे त्याचे नाव आहे. मंगल हा इयत्ता अकरावीत शिकत होता. सोबतच शेतावर फवारणीचीही कामे करीत होता. बुधवारी रात्र होऊनही तो घरी न परतल्याने कुटुंबीयांनी शोध घेतला असता शेतात पडलेला दिसून आला. उपचारासाठी पुसदच्या रुग्णालयात दाखल करण्यात आले असता डॉक्टरांनी त्याला मृत घोषित केले. तर उमरखेड तालुक्यातील आमणी खुर्द येथील श्रीराम खोसे (३०) यांना फवारणी करताना अस्वस्थ वाटू लागल्याने सवनाच्या शासकीय रुग्णालयात दाखल करण्यात आले आहे. मागील वर्षी कीटकनाशक फवारणीने २३ जणांचा मृत्यू झाला होता.