इकबाल मुल्ला
लोहारा/प्रतिनिधी :- गरजू रुग्णांचा शोध घेऊन त्यांना वैद्यकीय मदत मिळवून देण्याकरीता जागतिक महिला दिनानिमित्त 4 मार्च रोजी उस्मानाबाद जिल्हयातील महिला व बालकांसाठी महाआरोग्य शिबीर होणार असल्याची माहिती जिल्हाधिकारी राधाकृष्ण गमे यांनी बैठकीत दिली आहे.यावेळी आमदार सुजितसिंह ठाकुर,जिल्हा शल्य चिकित्सक डॉ.गलांडे,जिल्हा आरोग्य अधिकारी डॉ. वडगावे यांच्यासह विविध वैद्यकीय महाविद्यालयांचे प्राचार्य,प्राध्यापक,रुग्णालयांचे अधिष्ठाता,प्राध्यापक आदिंची प्रमुख उपस्थिती होती.
राज्याचे मुख्यमंत्री देवेंद्र फडणवीस यांच्या संकल्पनेतून व वैद्यकीय शिक्षण व जलसंपदा मंत्री गिरीश महाजन यांच्या मार्गदर्शनाखाली जागतिक महिला दिनाचे औचित्य साधून दि.4 मार्च रोजी विनामूल्य भव्य महिला व बाल महाआरोग्य शिबीर, पोलीस कवायत मैदान,उस्मानाबाद येथे आयोजित करण्यात येणार आहे. या शिबिरात सुमारे 1 हजार 400 तज्ञ डॉक्टर त्यामध्ये पद्मश्री डॉ.तात्याराव लहाने,डॉ.भोजराज, डॉ.रणजित जगताप,डॉ.रमाकांत पांडा,वैद्यकीय शिक्षण व संशोधनचे संचालक डॉ.प्रविण शिनगारे, प्रभारी आयुष संचालक डॉ.गोविंद खटी,अदि डॉक्टर उपस्थित राहणार आहेत.शिबिराच्या रचनेत एकूण तीन रुग्ण नोंदणी विभाग, नव्वद बाहयरुग्ण कक्ष,विशेष मोतीबिंदु,ह्दयरोग,
बालशल्यचिकित्सा,महिला कर्मरोग तपासणी, त्वचारोग,हाडांचे विकार,मासिक पाळी संबंधी आजार,आयुर्वेद,होमिओपॅथी,युनानी,योगा इत्यादी, सर्व सोयीसुविधायुक्त दंततपासणी वाहने,मॅमोग्राफी व कर्करोग तपासणी वाहन,दहा ॲम्ब्यूलन्स,दोन कार्डीयाक ॲम्ब्युलन्स,चार अग्नीशमन वाहने उपस्थित राहणार आहेत.त्याचप्रमाणे सर्व गरजु रुग्णांना मोफत चष्मे,दातांची कवळी,औषधी,ज्या रुग्णांना शस्त्रक्रिया,एम.आर.आय.,सोनोग्राफी, एक्सरे,रक्त,लघवी तपासणी करावयाची आहे.त्यांना सर्व सुविधा मोफत दिली जाणार आहे.तसेच सर्वांना मोफत भोजन व पाणी आयोजकांमार्फत दिले जाणार आहे.
SHARE THIS
