 |
अकोला, दि. 30 - मागील वर्षी कमी पर्जन्यमानामुळे निर्माण होणाऱ्या संभाव्य पाणी टंचाई परिस्थितीवर मात करण्यासाठी टंचाई आराखडयानुसार प्रस्तावित केलेली कामे तातडीने पूर्ण करण्यात यावीत, असे निर्देश जिल्हाधिकारी आस्तिक कुमार पाण्डेय यांनी दिले. पाणी टंचाई निवारणार्थ करण्यात येणाऱ्या उपाययोजनांबाबत आज जिल्हाधिकारी यांच्या दालनात बैठक पार पडली. यावेळी संबंधित अधिकाऱ्यांना त्यांनी सदरनिर्देश दिले. प्रारंभी आमदार बळीराम सिरस्कार यांनी बाळापूर व पातुर तालुक्यात टंचाई निवारणासाठी जलदगतीने उपाययोजना करण्याबाबत सांगितले. बैठकीला मुख्य कार्यकारी अधिकारी एस. रामामूर्ती, मनपा आयुक्त जितेंद्र वाघ, निवासी उपजिल्हाधिकारी श्रीकांत देशपांडे, सर्व तहसिलदार, गटविकास अधिकारी, महाराष्ट्र जीवन प्राधिकरणाचे अधिकारी, भूजल सर्व्हेक्षण विभागाचे अधिकारी यावेळी उपस्थित होते. जिल्हाधिकारी यांनी बैठकीच्या सुरुवातीला टंचाई निवारणार्थ ऑक्टोबर ते डिसेंबर या कालावधीत कोणत्या उपाययोजना करण्यात आल्या, याचा आढावा घेतला. त्यानंतर जानेवारी ते जून-2018 या कालावधीत टंचाई निवारणार्थ टंचाई कृती आराखडयात कोणत्या बाबी प्रस्तावीत करण्यात आल्या आहेत, याबाबतची माहिती तालुकानिहाय तहसिलदार व गटविकास अधिकाऱ्यांकडून जाणून घेतली. टंचाई निवारण कामांसाठी निधीची कमतरता भासू दिली जाणार नाही, शासनाकडून अतिरिक्त निधीची मागणी करण्यात येईल,असे सांगून जिल्हाधिकारी म्हणाले की, तहसिलदार व गट विकास अधिकाऱ्यांनी संयुक्तपणे सरंपच,तलाठी, ग्रामसेवक यांची बैठक घेऊन गावातील टंचाई परिस्थितीचा आढावा घ्यावा.
 |
प्रस्तावित कामांमध्ये विहिर खोलीकरण, गाळ काढणे, विंधन विहिरी, विहीर अधिग्रहण करणे, टँकरव्दारे पाणी पुरवठा, नळ व कुपनलिका दुरुस्ती, तात्पुरती पुरक नळ योजना, नळयोजना विशेष दुरुस्ती याबाबींचा समावेश असून ग्रामीण भागातील संभाव्य पाणी टंचाई निवारणासाठी 26 कोटी 85 लक्ष 38 हजार रुपयांचा निधी मंजूर करण्यात आला आहे.
अकोला शहरात संभाव्य टंचाई निवारणासाठी उपाययोजना करण्यात आल्या असून सुमोर 4 कोटी 23 लक्ष रुपयांचा आराखडा प्रस्तावित करण्यात आल्याचे श्री. वाघ यांनी सांगितले.