चेन्नई :- तामिळनाडूचे राज्यपाल बनवारीलाल पुरोहित यांच्याविरोधात लेख छापून त्यांना बदनाम केल्याच्या आरोपावरून तामिळनाडूतील ज्येष्ठ पत्रकार नक्कीरन गोपाल यांच्यावर राजद्रोहाचा गुन्हा दाखल करण्यात आला आहे. गोपाल यांना पोलिसांनी ताब्यातही घेतलं आहे. राजभवनातून करण्यात आलेल्या तक्रारीनंतर चेन्नई पोलिसांनी ही कारवाई केली आहे.
नक्कीरन गोपाल हे एका तामिळी नियतकालिकाचे संपादक आहेत. गोपाल यांनी निर्मला देवी सेक्स स्कॅंडल प्रकरणाशी संबंधित लेख त्यांच्या नियतकालिकातून प्रसिद्ध केले होते. ते प्रसिद्ध झाल्यानंतर राजभवनने पोलिसांत तक्रार दाखल केली. त्यानंतर तात्काळ चक्रे फिरली आणि पोलिसांनी गोपाल यांना ताब्यात घेतले.
गोपाल यांना पोलिसांनी ताब्यात घेतल्यानंतर एमडीएमकेचे नेते वायको यांनी त्यांची भेट घेण्याचा प्रयत्न केला. मात्र, पोलिसांनी त्यांना भेटीची परवानगी नाकारली. वायको यांनी पोलिसांच्या या भूमिकेचा निषेध करत तामिळनाडू सरकारवर जोरदार टीका केली.