काईम्बतूर :- समलैंगिकता गुन्हा नसल्याच्या सुप्रीम कोर्टाच्या ऐतिहासिक निर्णयाविरोधात एका ख्रिश्चन धर्मगुरूने जिल्हा न्यायालयाच्या आवारात घोषणा दिल्या. समलैंगिक विवाहांमुळे नैसर्गिक संकट येऊ शकते, असा दावा या ख्रिश्चन धर्मगुरूने केला. लोकांनी समलैंगिक विवाहांचे समर्थन करू नये आवाहनही या धर्मगुरूने केले. फादर फेलिक्स जेबासिंग असे पुलियाकुलमच्या एका चर्चमधील या धर्मगुरूचे नाव आहे. जेबासिंग थेट जिल्हा न्यायालयाच्या आवारात पोहोचले आणि त्यांनी घोषणाबाजी सुरू केली. फादर जेबासिंग यांना पोलिसांनी घेरल्यानंतर ते म्हणाले,
'भारतीय दंड संहितेच्या कलम ३७७वरील सुप्रीम कोर्टाच्या निर्णयाचे कुणीही समर्थन करू नये. प्रभू येशू येणार आहेत. त्यांचे लवकरच आगमन होणार आहे. अशा प्रकारच्या विवाहांमुळे समाज उद्ध्वस्त होईल ते पुढे म्हणाले, 'परमपित्याने सोडोम आणि गोमोरा ही शहरे आग आणि सल्फरद्वारे उद्ध्वस्त केली होती. कारण या शहरांनी समलैंगिकतेचे समर्थन केले होते. समलैंगिकतेचे समर्थन कधीही करू नका.
फादर जेबासिंग यांना जवळच्या पोलीस ठाण्यात नेण्यात आले आणि थोड्या वेळाने त्यांना सोडून देण्यात आले, अशी माहिती पोलिसांनी दिली. सुप्रीम कोर्टाने ६ सप्टेंबर रोजी १५८ वर्षे जुना कायदा रद्दबातल करत समलैंगिकता हा गुन्हा नसल्याचा ऐतिहासिक निर्णय दिला. या निर्णयाचे एलजीबीटीक्यू समुदायाच्या सदस्यांनी, तसेच विविध राजकीय पक्षांनी स्वागत केले होते.