मुंबई :- 'मराठा समाजाच्या आरक्षणाबाबत सरकारने दिलेली आश्वासने अद्याप पूर्ण झालेली नाहीत. त्यामुळे वातावरण बिघडण्याआधी मराठा समाजाला न्याय द्या', असा इशारा शिवसेना पक्षप्रमुख उद्धव ठाकरे यांनी मंगळवारी दिला. 'सणासुदीच्या काळात या समाजावर गुन्ह्यांच्या माध्यमातून आणलेले कायद्याचे खोटे विघ्न दूर करा', असेही ते म्हणाले.
मराठा समाजाला आरक्षण मिळावे यासाठी मराठी क्रांती ठोक मोर्चाच्या वतीने राज्यभरात करण्यात आलेल्या आंदोलनादरम्यान अनेक आंदोलकांवर दाखल करण्यात आलेले गुन्हे मागे घेण्याबाबत मुख्यमंत्र्यांनी आश्वासन देऊन एक महिना लोटला तरी अद्याप काहीच झालेले नाही. त्यामुळे याबाबत मुख्यमंत्र्यांची वेळ घेऊन मराठा समाजाच्या आरक्षणाबरोबराच इतर मागण्यांचा प्रश्न मार्गी लावा, या मागणीसाठी मराठा क्रांती ठोक मोर्चाच्या पदाधिकाऱ्यांनी मंगळवारी शिवसेना पक्षप्रमुख उद्धव ठाकरे यांची मातोश्री येथे भेट घेतली. त्यानंतर उद्धव ठाकरे पत्रकारांशी बोलत होते.
ते म्हणाले की, 'राज्यात जे अटकसत्र सुरू आहे, त्यात निरपराध मावळ्यांची धरपकड होत आहे. मुख्यमंत्र्यांनी गुन्हे मागे घेण्याबाबत आश्वासन दिले असले तरी त्याचे कोणतेही आदेश पोलिसांना देण्यात आलेले नाहीत. पोलिसांकडे हिंसाचाराबाबत काही पुरावे असतील, तर जरूर अटक करा, पण ज्यात तथ्य नाही, ते गुन्हे मुख्यमंत्र्यांनी ताबडतोब मागे घ्यायला हवेत. सणासुदीच्या काळात त्यांच्यावर कायद्याचे जे खोटे विघ्न आणले जात आहे, ते दूर व्हायला हवे', असेही ते म्हणाले. 'मराठा समाजाचे अनेक प्रश्न असून, त्यांच्या न्यायाबाबत विधानसभेचे अधिवेशन कधी भरवणार', असा सवाल करतानाच, 'लवकरच हे अधिवेशन भरवून त्यांचा प्रश्न सोडवावा. चालढकल करून या समाजाला फसवू नका', असेही उद्धव ठाकरे म्हणाले.
'कोपर्डी खटल्यात निकम यांची नेमणूक करा'
'कोपर्डी प्रकरण जलदगती न्यायालयात अडकले आहे. त्यामुळे या खटल्यात सरकारी वकिल उज्ज्वल निकम यांची नेमणूक करून आरोपींना फाशी होण्याच्या दृष्टीने प्रयत्न व्हायला पाहिजेत. न्यायासाठी शिवसेना समाजासोबत राहीलच. पण सरकारने दिलेली आश्वासने अजून पाळलेली नाहीत. कायद्याच्या चुकीचा वरवंटा त्यांच्या घरावर फिरतोय. त्यामुळे वातावरण बिघडण्याच्या आत त्यांना न्याय मिळायला हवा. सरकारने दिलेला शब्द या भूलथापा ठरू नयेत', असे सांगतानाच 'जातीपातीबाबत न्याय मिळवण्याची वेळ आज आली हे दुर्दैव आहे', अशी खंतही त्यांनी व्यक्त केली.