ठाणे :- अवघ्या सहा महिन्याच्या मुलाची त्याच्या आईनेच नाल्याच्या पाण्यात बुडवून हत्या केल्याची खळबळजनक घटना भिवंडीतील कासपाडा भागात घडली आहे. मुलगा सारखा रडून त्रास देत असल्याने, तसेच तीही सारखी आजारी पडत असल्याने रागाच्या भरात हे कृत्य केल्याची कबुली तिने पोलिसांना दिली. कल्पना नीलेश गायकर (२५) असे या आईचे नाव असून पोलिसांनी तिच्यावर हत्येचा गुन्हा नोंदवून तिला अटक केली आहे.
भिवंडीतील धापसीपाड्यामध्ये कल्पना ही पती आणि दोन मुलांसह राहते. लहान मुलगा ऋषभ (६ महिने) याचा बुधवारी अचानक मृत्यू झाला होता. भिवंडी तालुका पोलिस ठाण्यात आकस्मिक मृत्यूची नोंद करण्यात आली होती. मात्र शवविच्छेदनाच्या प्राथमिक अहवालात ऋषभचा मृत्यू पाण्यात बुडून झाल्याचे स्पष्ट झाले. साक्षीदारांनी दिलेल्या साक्षींनंतर, पोलिसांनी कल्पना हिच्याकडे चौकशीचा फेरा वळवला. त्यात आपणच ऋषभची पाण्यात बुडवून हत्या केल्याची कबुली तिने पोलिसांना दिली.