मुंबई :- डॉ. नरेंद्र दाभोलकर यांच्याप्रमाणेच अखिल भारतीय अंधश्रद्धा निर्मूलन समितीचे अध्यक्ष श्याम मानव, मुक्ता दाभोलकर, राष्ट्रवादी काँग्रेसचे आमदार जितेंद्र आव्हाड आणि रितू राज हेही हिटलिस्टवर होते, अशी धक्कादायक माहिती नालासोपारा शस्त्रसाठ्याप्रकरणी एटीएसनं अटक केलेल्या आरोपींच्या चौकशीतून पुढं आली आहे.
मुंबई सत्र न्यायालयात एटीएसनं आज ही माहिती दिली. अविनाश पवार या आरोपीला आज न्यायालयात हजर करण्यात आलं होतं. पवारच्या अधिक चौकशीसाठी त्याची कोठडी वाढवून मिळावी, अशी मागणी एटीएसनं न्यायालयाकडं केली होती. मात्र, न्यायालयानं आतापर्यंतच्या तपासाची माहिती देण्याचे आदेश एटीएसच्या वकिलांना दिले. त्यावेळी एटीएसकडून देण्यात आलेल्या माहितीत ही नावं उघड झाली.
नालासोपारा येथील शस्त्रसाठाप्रकरणी सुरुवातीला एटीएसनं वैभव राऊत, शरद कळसकर, सुधन्वा गोंधळेकर, श्रीकांत पांगारकर यांना अटक केली होती. त्यांच्या चौकशीत अविनाश पवारचं नाव समोर आल्यानंतरही त्यालाही ताब्यात घेण्यात आलं होतं.