नवी मुंबई :- खारघरमधील भाजपचा नगरसेवक शत्रुघ्न काकडे व त्याच्या साथीदारांनी ५० हजार रुपयांच्या खंडणीसाठी खारघर सेक्टर-४मधील हॉटेल व्यावसायिक इम्तियाज निसार अहमद शेख (४१) यांना बेदम मारहाण केल्याची घटना शुक्रवारी रात्री घडली. या मारहाणीत हॉटेल व्यावसायिक इम्तियाज शेख जखमी झाले आहेत. या प्रकारानंतर खारघर पोलिसांनी नगरसेवक शत्रुघ्न काकडे व त्याच्या ८ ते १० साथीदारांविरोधात खंडणीसह धमकावणे, मारहाण करणे, आदी कलमान्वये गुन्हा दाखल करून त्यांचा शोध सुरू केला आहे.
इम्तियाज शेख यांनी भागीदारीत खारघर सेक्टर-४मध्ये महिनाभरापूर्वीच हॉटेल सुरू केले. त्यानंतर त्या भागातील भाजपचे नगरसेवक शत्रुघ्न काकडे हॉटेलवर गेले. त्यांनी दर महिन्याला ५० हजार रुपये द्यावे लागतील, असा धमकीवजा इशारा दिला होता. शुक्रवारी रात्री इम्तियाज आपली गाडी हॉटेलसमोर उभी करत असताना, शत्रुघ्न व त्याचे साथीदार त्या ठिकाणी गेले. त्यानंतर त्यांनी इम्तियाजला शिवीगाळ करून त्याच्याकडे पुन्हा ५० हजार रुपयांची मागणी केली. यावेळी इम्तियाज यांनी नकार दिल्याने शत्रुघ्न काकडे व त्यांच्या साथीदारांनी इम्तियाजसोबत एका तरुणाला मारहाण केली.