लखनौ :- छत्रपती शिवाजी महाराजांचा अपमान करणारा मजकूर असलेले 'व्याकरण वाटिका ५' हे उत्तर प्रदेशच्या शालेय अभ्यासक्रमातील हिंदी पुस्तक अखेर मागे घेण्यात आलं आहे. शिवाजी शूर होते, पण बुद्धिमान नव्हते, असा उल्लेख एका प्रकरणात करण्यात आला होता. त्यावर मराठा संघटनांनी आक्षेप घेत अमरावतीच्या जिल्हाधिकाऱ्यांकडे तक्रार करून कारवाईची मागणी केली होती.
'व्याकरण वाटिका ५' हे पुस्तक डॉ. अनुराधा यांनी लिहिलं होतं. तसंच मधुबन प्रकाशनानं ते प्रकाशित केलं होतं. त्यात शिवरायांचा अवमान करणारा मजकूर असल्यानं वाद निर्माण झाला होता. संभाजी ब्रिगेड, जिजाऊ ब्रिगेड आणि मराठा सेवा संघ आदी संघटनांनी अमरावतीच्या जिल्हाधिकाऱ्यांकडे तक्रार केली होती.
या पुस्तकावर वाद निर्माण झाल्याचे वृत्त प्रसिद्ध झाल्यानंतर उत्तर प्रदेश सरकारनं याबाबत स्पष्टीकरण दिलं आहे. 'याआधीच पुस्तकाची छपाई बंद केली असून, विक्री आणि वितरणही थांबवण्यात आलं आहे. बाजारातील पुस्तकंही मागे घेण्याची प्रक्रिया सुरू झालेली आहे.
तज्ज्ञांच्या समितीकडून या मजकुराची शहानिशा करून तो दुरुस्त करण्यात येत नाही, तोपर्यंत पुस्तकाची नव्याने छपाई करण्यात येणार नाही,' असं सरकारनं स्पष्ट केलं आहे. पुस्तकातील मजकुरामुळं कोणाच्याही भावना दुखावल्या असतील तर, आम्ही दिलगीर आहोत, असंही त्यांनी म्हटलं आहे.