गुवाहाटी :- ११ जुलै रोजी जगभर जागतिक लोकसंख्या दिन साजरा होत असताना मिझोरामध्ये एका एनजीओने येथील नागरिकांना भरपूर मुलं जन्माला घालण्याचं आवाहन केल्यानं आश्चर्य व्यक्त केलं जात आहे.
इतर राज्यांच्या तुलनेत मिझोरामची लोकसंख्या प्रचंड कमी आहे. त्यामुळे भरपूर मुलांना जन्माला घालून केंद्र सरकारच्या नागरिकत्व संशोधन विधेयकाला विरोध करा, असं आवाहनही या एनजीओने केलं आहे.'यंग मिझोराम असोसिएशन' असं या एनजीओचं नाव आहे. 'फॅमिली प्लॅनिंग करण्याची गरज असल्याचं चर्च आणि समाजाने मानायला सुरुवात केली आहे.
पण याचा अर्थ असा नाही की मुलांच्या संख्येवर नियंत्रण आणावं. याबाबत लोकांचं काय मत आहे, हे आम्हाला जाणून घ्यायचं आहे,' असं या एनजीओचे केंद्रीय अध्यक्ष वानलालरुआता यांनी सांगितलं.'मिझोरामची लोकसंख्या वाढल्यास राज्याचा विकास होईल.
राज्यात नवीन उद्योग निर्माण होतील,' असंही त्यांनी सांगितलं. दरम्यान, २०११ च्या जनगणनेनुसार मिझोराची लोकसंख्या १०.९१ लाख एवढी आहे. सिक्कीमनंतरच सर्वात कमी लोकसंख्या असलेलं हे राज्य आहे. मिझोराममध्ये अनेक भाग ओसाड आहेत. या ठिकाणी बांगलादेशी नागरिकांनी हळूहळू बस्तान बसवायला सुरुवात केली आहे