नवी दिल्ली :- 'राजकीय आयुष्यात मला माझ्या योग्यतेपेक्षा खूप अधिक मिळालंय. त्यामुळं मी कोणत्याही शर्यतीत नाही. पंतप्रधानपदाच्याही नाही,' असं केंद्रीय रस्ते व परिवहनमंत्री नितीन गडकरी यांनी स्पष्ट केलं आहे.मोदी सरकारला चार वर्षं पूर्ण झाल्याच्या पार्श्वभूमीवर एका न्यूज वेबसाइटला दिलेल्या मुलाखतीत गडकरी बोलत होते. आगामी लोकसभा निवडणुकीत भाजपला बहुमत न मिळाल्यास सर्वसहमतीचा उमेदवार म्हणून आपल्याकडं पाहिलं जात असल्याबद्दल त्यांना विचारण्यात आलं होतं. त्यावर बोलताना गडकरी यांनी कुठल्याही शर्यतीत नसल्याचं स्पष्ट केलं. 'मी माझ्या पक्षाच्या विचारधारेशी एकनिष्ठ आहे. मंत्री म्हणून मी खूप समाधानी आहे. मला पंतप्रधानपदाच्या शर्यतीत उतरण्याची इच्छा नाही,' असं त्यांनी सांगितलं. 'पुढील निवडणुकीत भाजपलाच पूर्ण बहुमत मिळेल आणि नरेंद्र मोदी हेच पंतप्रधान होतील,' असा विश्वासही त्यांनी व्यक्त केला.
- मोदींना अनेकदा विरोध करतो!
नरेंद्र मोदी यांचं मंत्र्यांवर दडपण असतं का, या प्रश्नाला गडकरी यांनी नकारार्थी उत्तर दिलं. 'केंद्रीय मंत्रिमंडळाच्या बैठकीत मी अनेकदा मोदींच्या मतांशी असहमती दर्शवलीय. त्यासाठी मला कुठल्याही नाराजीचा सामना करावा लागलेला नाही. मंत्रिमंडळाच्या बैठकीत प्रत्येक मंत्र्याला बोलण्याची संधी मिळते. अनेक जण वेगवेगळी मतं मांडतात. मोदी सर्वांचंच ऐकतात,' असं गडकरी म्हणाले.
- अच्छे दिन आलेत का ?
'अच्छे दिन'बद्दलचा प्रत्येकाचा दृष्टिकोन वेगळा आहे. ही संकल्पना व्यक्तिनिहाय बदलते. लोकांच्या अपेक्षा सतत वाढत असतात. मात्र, भूतकाळातील कारभार आणि सध्या सरकारची कामगिरी याची तुलना केल्यास फरक सहज लक्षात येतो,' असं गडकरी म्हणाले.