धुळे :- गेल्या चार दिवसांपासून ठिय्या आंदोलन करीत शांततेने सरकारचे लक्ष वेधण्याचा प्रयत्न करणाऱ्या धुळे जिल्हा मराठा क्रांती मोर्चाच्या संयोजकांनी आता अधिक आक्रमक होण्याचा पवित्रा घेतला आहे. यासाठी आज (दि. २५) सकाळी धुळ्यात राज्य सरकारसह मूकदर्शक बनलेल्या मराठा समाजाच्या १४७ आमदारांची प्रतिकात्मक अंत्ययात्रा काढण्याची घोषणा आंदोलकांनी केली आहे. जिल्हाधिकारी कार्यालयासमोर ही प्रतीकात्मक पुतळे जाळले जाणार असल्याची माहिती देण्यात आली आहे.
आपल्या न्याय हक्कासाठी मराठा बांधव काकासाहेब शिंदे यांनी आपली जीवनयात्रा संपवली तरी या महाराष्ट्र सरकारला जाग आली नाही. मराठा बांधवांच्या जीवावर निवडून आलेले १४७ आमदार अद्याप तरी तोंड उघडायला तयार नाहीत, असे निवेदनात नमूद केले आहे. त्यासाठी सरकारच्या विरोधात आज सकाळी १० वाजता छत्रपती शिवाजी महाराज पुतळा येथून प्रतीकात्मक अंत्ययात्रा काढून जिल्हाधिकारी कार्यालय येथे पुतळादहन होणार आहे, अशी माहिती मराठा क्रांती मोर्चातर्फे देण्यात आली.
शहर आणि जिल्ह्यात मराठा समाजाने पुकारलेल्या महाराष्ट्र बंदचा कुठलाही परिणाम मंगळवारी दिसून आला नाही. जिल्ह्यातील सर्वत्र शांतता असून, कोठेही अनुचित प्रकार घडलेला नाही. धुळे शहरासह शिरपूर, साक्री, शिंदखेडा, दोंडाईचा येथे एस. टी. बससह खासगी आणि सावर्जनिक वाहतूक सुरळीत सुरू आहे. सोबतच शाळा, महाविद्यालये, शासकीय कार्यालये, बाजारपेठाही नेहमीप्रमाणे उघडलेल्या होत्या.
- शहाद्यात प्रतिसाद
नंदुरबार जिल्ह्यातील शहादा येथे सकल मराठा कुणबी समाजाच्या वतीने बुधवारी सकाळी शहरात बंदची हाक देऊन निषेध व्यक्त करण्यात आला. या आंदोलनात मराठा समाजाचे शाम जाधव, अनिल भामरे, भूषण पाटील, प्रा. दत्तात्रय शिंदे, देवा बोराणे, विजय कदम यांच्या शेकडोच्या संख्येने समाजबांधव सहभागी झाले होते. शहादा शहरात बंदला शंभर टक्के प्रतिसाद मिळाला असून, बससेवा व शाळा सोडून शहरातील बाजारपेठ, व्यवहार ठप्प होते.
- या आहेत मागण्या...
- न्याय हक्कासाठी मराठा समाजाला आरक्षण द्यावे
- आरक्षण मिळेपर्यंत ७२,००० हजार नोकरभरती रद्द करावी
- कोपर्डी येथील आरोपींना तत्काळ फाशी द्यावी