 |
डॉ. चैतन्य शेंबेकर, डॉ. लक्ष्मी श्रीखंडे, डॉ. दर्शना पवार, डॉ. वर्षा ढवळे असे गुन्हा दाखल झालेल्या डॉक्टरांची नावे आहेत. मनीष सुरजरतन मुंदडा (वय ३२) आणि हर्षा मनीष मुंदडा असे अटक झालेल्या इतर दोन आरोपींची नावे आहेत. पोलिसांनी दिलेल्या माहितीनुसार आर्थिक संपन्न ज्या दाम्पत्यांना मुलबाळ होत नाही, त्यांना 'सरोगसी मदर्स' पद्धतीने बाळ होवू शकते. याचा गैरफायदा घेत आर्थिक दृष्ट्या दुर्बल घटकातील महिलांना गर्भाशय भाड्याने देण्यासाठी प्रवृत्त केले जाते. त्यासाठी डॉक्टरांच्या साक्षीने वंधत्व कुटुंब आणि गर्भाशय भाड्याने देणाऱ्या महिलांमध्ये नियमानुसार करार होतो. मनीष मुंदडा आणि त्यांच्या पत्नीने पैसे कमाविण्यासाठी या मार्गाचा गैरवापर करीत रुग्णालयांना 'सरोगसी'साठी महिला उपलब्ध करण्याचा व्यवसाय सुरू केला.
गर्भाशय भाड्याने घेण्यासाइी हे दांपत्य घटस्फोटीत किंवा कुटुंबापासून विभक्त महिलांना हेरत होते. महिलेचे बाळंतपण होताच बाळ गरजू कुटुंबाला सोपविले गेले. नंदनवन परिसरातील सुमारे १३ महिलांना यासाठी तयार करण्यात आले होते. मात्र त्यापोटी १४ लाख रुपये अदा न झाल्याने महिलांनी नंदनवन पोलिसांत धाव घेतली. पोलिसांनी सहा जणांवर गुन्हा दाखल करत मुंदडा दांम्पत्याला अटक केली. रविवारी न्यायालयाने या आरोपींना पोलिस कोठडी सुनावल्याने इतरही नावे पुढे येण्याची शक्यता आहे.
याप्रकरणात नावे गुंतलेल्या डॉक्टरांशी संपर्क साधला असता त्यांनी पैशाच्या बाबतीत आमचा कोणताही संबंध नसल्याचे सांगितले. रुग्णाकडून उपचारापोटी जी रक्कम आम्ही घेतली तेवढाच काय तो आमचा व्यवहाराशी संबंध आहे. तोही व्यवसायाचा भाग आहे. त्यामुळे दलालाने काय केले याचा आमच्याशी काहीही संबंध नसल्याचे डॉ. लक्ष्मी श्रीखंडे यांनी प्रतिक्रियेत नमूद केले. डॉ. वर्षा ढवळे म्हणाल्या की, आपले 'सरोगसी सेंटर'च नाही.
डॉ. दर्शना पवार यांनी त्यांच्या सेंटरमध्ये नियमानुसार 'सरोगसी'ची प्रक्रिया करून रुग्ण पाठवल्यावर प्रसुती प्रक्रिया केली. रुग्णाची गरज पाहता आपण फक्त बाळंतपण केले. त्यामुळे या आर्थिक व्यवहाराशी आपला दुरान्वयेही संबंध नाही. इतरांनीही कायद्याानुसारच प्रक्रिया केली आहे. या प्रकरणात पोलिसांनी गुन्हा दाखल करतानाही आपली बाजू जाणून घेतली नाही. त्यामुळे आपण न्यायालयात दाद मागणार आहोत, असेही त्यांनी नमूद केले.