शाहजहापूर :- लोकसभेतील अविश्वास प्रस्ताव बहुमतानं जिंकल्यामुळं फॉर्मात आलेल्या पंतप्रधान नरेंद्र मोदी यांनी आज काँग्रेस अध्यक्ष राहुल गांधी यांच्यावर जोरदार हल्ला चढवला. राहुल गांधी यांनी आपल्याला मिठी का मारली,' याचा गौप्यस्फोटही मोदींनी केला. 'आमच्या सरकारविरोधात अविश्वास प्रस्ताव का आणला याचं कारणच राहुल गांधींना सांगता येत नव्हतं. त्यांची गोची झाली होती. त्यामुळंच ते माझ्या गळ्यात पडले,' असा टोला मोदींनी हाणला.
शाहजहापूर इथं झालेल्या शेतकरी मेळाव्यात ते बोलत होते. अविश्वास प्रस्तावामागील राजकारण व राहुल यांची गळाभेट हे मुद्दे उपस्थित करत त्यांनी या सभेत काँग्रेससह विरोधकांचा समाचार घेतला. 'आमच्याविरुद्ध अविश्वास प्रस्ताव का आणला, असं आम्ही वारंवार विरोधकांना विचारत होतो. काहीतरी कारण द्या अशी विनवणी करत होतो. पण त्यांच्याकडं सांगण्यासारखं काहीच नव्हतं. अशा परिस्थितीत काय करायचं असा विचार करून ते माझ्या गळ्यात पडले', असं मोदी म्हणाले. 'भ्रष्टाचार आणि घराणेशाहीच्या विरोधात आमचं सरकार लढत असल्यानंच आमच्याविरोधात अविश्वास प्रस्ताव आणण्यात आला. विविध योजनांचे ९० हजार कोटी रुपये आता योग्य व्यक्तींच्या हातात पडत आहेत. त्यामुळं अनेकांची दुकानं बंद झाली आहेत. भ्रष्टाचार बंद झालाय. फुकटची कमाई बंद झालीय. अशी कामं करणाऱ्यांवर हे लोक विश्वास ठेवतील का,' असा सवालही त्यांनी केला.
'काल लोकसभेत झालेलं अवघ्या देशानं पाहिलं. खुर्चीसाठी त्यांची धावाधाव सुरू आहे. पंतप्रधानाच्या खुर्चीशिवाय त्यांना काही दिसत नाही. ना देश दिसतो ना देशातला गरीब. पण आमच्याकडं देशातील जनता व डॉ. बाबासाहेब आंबेडकरांनी दिलेल्या राज्यघटनेची ताकद आहे,' असं मोदी म्हणाले. 'देश आता बदललाय. येथील तरुणाचा दृष्टिकोन बदललाय. मुली जागरूक झाल्या आहेत. आता धमक्यांचा फॉर्म्युला चालणार नाही,' असा टोला त्यांनी काँग्रेसला लगावला. 'अनेक दल (पक्ष) भाजपविरोधात एकत्र येत आहेत. त्यामुळं नुसती दलदल (चिखल) झाली आहे आणि दलदलीत नेहमी कमळच फुलतं,' अशी मार्मिक टिप्पणीही त्यांनी केली.