भंडारा, दि.19 :- जिल्हा वार्षिक योजना सन 2018-19 साठी सर्वसाधारण योजना 86 कोटी 76 लाख, अनुसूचित जाती उपयोजना 49 कोटी 17 लाख व आदिवासी उपयोजना 14 कोटी 16 लाख असे एकूण 150 कोटी 9 लाख रुपयांचा प्रारुप आराखडा लघुगटांकडून प्रस्तावित करण्यात आला. आमदार राजेश काशिवार यांच्या अध्यक्षतेखाली जिल्हाधिकारी कार्यालयात आज लघुगटांची बैठक घेण्यात आली. याबैठकीत हा आराखडा प्रस्तावित करण्यात आला. जिल्हाधिकारी सुहास दिवसे, सहाय्यक जिल्हाधिकारी पृथ्वीराज बी.पी.,विदर्भ वैधानिक विकास महामंडळ नागपूरचे सदस्य डॉ. कपिल चंद्रायन व जिल्हा नियोजन समितीचे सदस्य श्रीमती जया यशवंत सोनकुसरे, जिल्हा नियोजन अधिकारी राजेश गायकवाड यावेळी उपस्थित होते. यावेळी बोलतांना आमदार राजेश काशिवार म्हणाले की, कोल्हापूरी बंधाऱ्याच्या बांधकाम दुरुस्तीसाठी उपलब्ध होणाऱ्या निधीतून साईट उपलब्ध असल्यास नवीन कोल्हापूरी बंधाऱ्याचे बांधकाम प्रस्तावित करण्यात यावेत. प्रस्तावित आराखडयात अंगणवाडी बांधकाम, शौचालय व अंगणवाडी दुरुस्ती यासाठी निधी प्रस्तावित आहे. जिल्हयातील 23 पुनर्वसित गावात प्राधान्याने अंगणवाडी बांधकाम घ्यावे, असे त्यांनी सांगितले. शाळांच्या इमारती व वर्गखोल्यांची अवस्था चांगली नसून या खोल्यांचे बांधकाम करणे आवश्यक आहे. जिल्हयातील जिल्हा परिषद शाळांच्या वर्गखोल्यांची सद्यस्थिती यावर शिक्षण विभागाने पालकमंत्री यांचे समोर सादरीकरण करावे, असे काशिवार यांनी सांगितले. या कामासाठी अतिरिक्त निधी उपलब्ध करुन घेण्यासाठी प्रयत्न करणार असल्याचे ते म्हणाले.
