इस्लामाबाद :- मिली मुस्लिम लीग नावाचा राजकीय पक्ष स्थापन करून पाकिस्तानच्या राजकारणात उतरलेला मुंबई हल्ल्याचा मास्टर माइंड, दहशतवादी हाफिज सईदला जोरदार सोशल झटका बसला आहे. फेसबुकने हाफिस सईदच्या पक्षाचं फेसबुक पेज डिलिट केलं आहे. विशेष म्हणजे हाफिजच्या पक्षाच्या उमेदवारांचे आणि त्याच्या पक्षाशी संबंधित अन्य फेसबुक पेजेसही डिलिट करण्यात आल्यानं हाफिजला ऐन निवडणुकीत मोठा झटका बसला आहे.
'एक्सप्रेस ट्रिब्यून'ने याबाबतचं वृत्त दिलं आहे. फेसबुकच्या या कृतीमुळे मिली मुस्लिम लीगचे धाबे दणाणले असून 'फेसबुकने त्यांच्या धोरणांचं उल्लंघन केलं आहे. हे अभिव्यक्ती स्वातंत्र्याचं हनन असून आमच्यावर फेसबुकने अन्याय केलाय,' असा टाहो मिली मुस्लिम लीगने फोडला आहे. येत्या २५ जुलै रोजी पाकिस्तानात मतदान होत आहे. या पार्श्वभूमीवर हाफिजच्या पक्षावर बंदी घालण्यात आली होती. त्यामुळे त्यांनी अल्लाह-ओ-अकबर तहरीक नावाने नवा राजकीय पक्ष स्थापन करून निवडणूक मैदानात उमेदवार उभे केले आहेत.
पाकिस्तानमध्ये २५ जुलै रोजी निवडणुका होत असल्याने फेसबुकनेही त्यापार्श्वभूमीवर अनेक निर्णय घेतले आहेत. पाकिस्तानमधील कोणत्याही दहशतवादी गटाने फेसबुकचा दुरुपयोग करू नये म्हणून हे निर्णय घेण्यात आल्याचं पाकिस्तानमधील कंपनीचे प्रवक्ते सरीम अजीज यांनी सांगितलं.