पुणे : काकासाहेब शिंदे यांच्या आत्महत्येप्रकरणी मुख्यमंत्री देवेंद्र फडणवीस यांच्यावर गुन्हा दाखल व्हावा तसेच त्यांनी राजीनामा द्यावा, अशी मागणी संभाजी ब्रिगेडचे प्रदेशाध्यक्ष मनोज आखरे यांनी मंगळवारी पत्रकार परिषदेत केली.
पंढरपूर येथे काही माणसे पाठवून दंगल घडविण्याचा मुख्यमंत्र्यांचा डाव संभाजी ब्रिगेडच्या कार्यकर्त्यांनी उधळून लावला, असा दावा त्यांनी केला. आर्थिक, सामाजिकदृष्ट्या मागासलेल्या मराठा समाजाला आरक्षण मिळावे, या मागणीसाठी मराठा समाजाने ५८ मोर्चे काढले. या मोर्चांमध्ये एकही दुर्दैवी घटना घडलेली नाही. अशा शांतताप्रिय समाजावर मुख्यमंत्री खोटे आरोप करत आहेत. मुख्यमंत्र्यांनी आतापर्यंत केवळ खोटी आश्वासने दिली. पंढरपूरला विठ्ठलाच्या पूजेसाठी ते आले असते तर त्यांना ठोस आश्वासन द्यावे लागले असते. पण मराठा समाजाला ते काहीच देऊ शकत नसल्याने त्यांनी न येण्याची पळवाट शोधली, अशी टीका आखरे यांनी केले. आत्तापर्यंत शांत असलेला मराठा तरुण खोट्या आश्वासनांमुळे आक्रमक होत आहे. आमदार, खासदार व मंत्री यांना जाब विचारायला तो कमी करणार नाही. वारीमध्ये साप सोडण्याचा डाव होता, या मुख्यमंत्र्यांच्या वक्तव्यामुळे मराठा समाजाचा अपमान झाला आहे. त्याबद्दल मुख्यमंत्र्यांनी मराठा समाजाची जाहीर माफी मागावी, अन्यथा राज्यातील वातावरण बिघडण्याची शक्यता आहे,' असा इशारा त्यांनी दिला. संभाजी ब्रिगेडचे जिल्हाध्यक्ष संतोष शिंदे व कोषाध्यक्ष संतोष गाजरे उपस्थित होते.